Frika nga mobilizimi ringjallet në Rusi: raportime për metoda intimiduese ndaj burrave të rinj

Frika nga një mobilizim i ri po përhapet përsëri në Rusi: sipas raportimit hulumtues të Al Jazeera-s, përpjekjet për rekrutim ushtarak po bëhen më aggressive, me raporte për metoda intimiduese ndaj burrave në moshë luftarake, në prag të një ofensive dimërore të pritshme të Moskës në Ukrainë. Raportimi dokumenton raste konkretë dhe reagimet kundërthënëse të autoriteteve lokale.

Një nga rastet është 26-vjeçari Sasha nga Orenburgu, qytet afër kufirit me Kazakistanin, i cili për shkak të sëmundjes mban kategorinë V të librit ushtarak — gjendje që normalisht e përjashton nga shërbimi, por jo në kohë lufte. Ai tregon për median se që nga mesi i 2025-ës ai dhe e fejuara i nënshtrohen trajtimit psikiatrik dhe marrin antidepresantë; del vetëm kur ka nevojë urgjente, përpiqet të mos mbetet kurrë vetëm dhe mban sprej me piper për mbrojtje.

Që nga qershori, në Penza, 625 kilometra juglindje të Moskës, janë raportuar përpjekje për kapje me forcë të rekrutëve: pamjet në rrjetet sociale tregojnë persona me rroba civile që përpiqen t'i fusin me forcë burrat në automjete drejt qendrës së rekrutimit, ndërkohë që gra të përlotuara përpiqen t'u dalin në ndihmë. Potencial rekrutët janë thirrur gjithashtu në komisariate me pretekste burokratike dhe, sipas raportimeve, janë rrahur ose kërcënuar — përmes mbjelljes së substancave narkotike — për të nënshkruar kontratë ushtarake.

Autoritetet lokale i mohojnë raportimet, duke pretenduar se i qasen vetëm burrave që shmangin shërbimin dhe janë mobilizuar tashmë, ndërsa akuzojnë banorët që shpërndajnë pamjet për përhapje dezinformimi. Sipas Mikhail Liberov nga Lëvizja e Kundërshtarëve me Ndërgjegje, rekruterët selektonin qëllimisht «objektivat e duhur»: persona të cenueshëm ndaj joshjes, mashtrimit ose shantazhit. Al Jazeera kujton se ankthi i mobilizimit ka mbetur i gjallë që nga thirrja e pjesshme e vitit 2022, kur dhjetëra mijëra rusë lanë vendin për t'i shpëtuar frontit.