Artisti disident kinez Gao Zhen dënohet me tre vjet burg për skulpturat satirike të Mao Ce Dunit
70-vjeçari që jeton në Nju Jork u arrestua gjatë një vizite në Kinë në 2024; familja njofton apelim dhe organizatat e të drejtave të njeriut kërkojnë lirimin e menjëhershëm.
Artisti disident kinez Gao Zhen, i njohur për skulpturat e tij satirike të ish-udhëheqësit Mao Ce Dun, është dënuar me tre vjet burg për "shpifje ndaj heronjve kombëtarë dhe martirëve", thanë gruaja e tij dhe një organizatë për të drejtat e njeriut, raporton Euronews Albania duke cituar Reuters.
Gao, 70 vjeç, që jeton në Nju Jork, u arrestua në gusht 2024 gjatë një vizite në Kinë dhe gjyqi u mbajt me dyer të mbyllura në fillim të këtij viti. Gruaja e tij, Zhao Jaliang, i tha Reuters se familja ishte e indinjuar nga vendimi dhe se Gao planifikon të apelojë.
Organizata "Chinese Human Rights Defenders" bëri thirrje për lirimin e tij të menjëhershë e pa kushte, me vlerësimin se artisti u dënua për vepra të kryera vite para hyrjes në fuqi të ligjit mbi bazën e të cilit u ndoq penalisht. Sipas organizatës, disa diplomatë perëndimorë u penguan të merrnin pjesë në gjyq, ndërsa gruaja e Gaos dhe djali i tyre, shtetas amerikan, nuk lejohen të largohen nga Kina që nga arrestimi.
Bashkë me vëllain e tij Gao Qiang, artisti krijoi vepra që kritikojnë Revolucionin Kulturor, periudha e persekutimit politik dhe trazirave sociale midis 1966 dhe 1976. Ndër veprat më të njohura janë "Zonjusha Mao", skulpturë e Mao Ce Dunit me tipare të deformuara, dhe "Faji i Maos", figurë bronzi e udhëheqësit gjunjëzuar në qëndrim pendese.
Prokuroria e bazoi çështjen në Ligjin e Kinës për Mbrojtjen e Heronjve dhe Martirëve, që hyri në fuqi më 2018 dhe u ashpërsua më 2021, por pretendimet penale lidhen me vepra arti të krijuara midis viteve 2005 dhe 2009 – argument që organizatat e të drejtave të njeriut e quajnë penalizim retrospektiv.
Pyet 383 për këtë lajm
Përgjigjet vijnë vetëm nga artikujt e botuar te 383, me burimet e lidhura.
Përgjigjet vijnë vetëm nga artikujt e botuar te 383 — nëse arkivi nuk e ka, do ta them.
