Administrata Trump: Qendra Kennedy mund të rrëzohet nëse nuk lejohen riparimet

Administrata e presidentit amerikan Donald Trump ka paralajmëruar se Qendra Kennedy e Uashingtonit mund të rrëzohet nëse nuk lejohen të përfundojnë rinovimet, përcjell Al Jazeera.

Në një dosje gjyqësore të hënës, avokatët e Departamentit të Drejtësisë i thanë një gjykate federale se ambienti i arteve performuese është në telashe të mëdha dhe se ai nuk mund të mbijetojë, as strukturalisht e as financiarisht, pa ndihmën e presidentit apo administratës së tij.

Pa këto përpjekje, qendra do të përkeqësohet më tej në një strukturë të pasigurt dhe të braktisur që do të duhet të hiqet, thuhet në dosje. Sipas të njëjtit dokument, në vend të objektit kulturor mund të ndërtohet një amfiteater i hapur me pamje nga lumi Potomac, i cili do të ishte më i thjeshtë dhe më ekonomik, megjithëse, siç e pranojnë vetë avokatët, një zëvendësim i tillë nuk do ta nderonte siç duhet emrin e John F. Kennedyt.

Zbulimi përmbahet në përgjigjen e administratës ndaj një përpjekjeje për të bllokur gdhendjen e emrit të Trump në ndërtesë. Deputetja demokrate Joyce Beatty, anëtare e bordit të qendrës përmes pozitës së saj në Kongres, ka paditur pasi anëtarët e emëruar nga Trump votuan 20 kundrejt 3 për shtimin e frazës se objekti u restaurua dhe u rinovua nga presidenti. Më parë bordi e kishte riemërtuar qendrën me emrin e Trump, përpara se një gjykatës të urdhëronte heqjen e emrit nga ndërtesa.

Vendimi për rrënimin e një objekti historik, i hapur në vitin 1971 në nderim të presidentit të vrarë, do të pinte sigurisht rezistencë nga grupet e ruajtjes së trashëgimisë. Deri tani nuk ka asnjë vendim gjyqësor për demolimin: ajo që ekziston është skenari i ngritur nga avokatët e qeverisë në një proces mbi emrin e objektit.