Trump ul flamujt në gjysmështizë për një javë në nderim të Dolly Parton

Presidenti amerikan Donald Trump ka njoftuar se flamujt amerikanë do të ulen në gjysmështizë në të gjithë Shtetet e Bashkuara në nderim të këngëtares së muzikës country Dolly Parton, e cila ndërroi jetë të martën në Nashville, Tennessee, në moshën 80-vjeçare, raporton Euronews Albania.

Përmes një postimi në rrjetin social Truth Social, Trump e cilësoi vdekjen e Parton si një humbje të madhe për miliona njerëz dhe tha se ajo ishte një figurë e pazëvendësueshme. Me hidhërim të madh njoftoj se Dolly Parton, një nga këngëtaret më të mëdha të muzikës country të të gjitha kohërave, sapo ka ndërruar jetë. Kjo është një humbje e vërtetë për miliona njerëz. Nuk ka pasur kurrë si ajo dhe nuk do të ketë kurrë më, shkroi presidenti.

Ai njoftoi se flamujt do të qëndrojnë në gjysmështizë për një javë, duke nisur nga ora 18:00 e së martës. Pusho në paq, Dolly! Bota të do, përfundoi postimi i tij. Vdekja e artistes ishte konfirmuar më parë nga familjarët e saj përmes një videoje të publikuar në rrjetet sociale, ndërsa presidenti theksoi se humbja prek miliona fansa anembanë botës.

Parton ishte një nga figurat më të rëndësishme të muzikës country, me një karrierë që u shtri mbi gjashtë dekada. Ajo u bë e njohur në mbarë botën me hite si Jolene, 9 to 5 dhe I Will Always Love You, ndërsa fitoi 11 çmime Grammy dhe shiti më shumë se 100 milionë disqe gjatë rrugëtimit të saj artistik. Sipas profilit të publikuar nga The Guardian në ditën e vdekjes, lajmi u njoftua nga nipi i artistes, Brian Seaver, përmes Instagram-it.

Përtej muzikës, ajo u angazhua gjerësisht në filantropi, veçanërisht përmes programit Imagination Library, që synon nxitjen e leximit te fëmijët përmes shpërndarjes së librave falas. Ulja e flamujve në gjysmështizë nga një president për një personalitet të kulturës është një nder i rrallë, që e vendos Parton mes pak figurave të artit të nderuara në këtë mënyrë nga shteti amerikan.