Trump propozon riemërtimin e Liqenit Ontario në "Liqeni Amerika" mes luftës tregtare

Presidenti amerikan Donald Trump tha të martën se po shqyrton riemërtimin e Liqenit Ontario në "Liqeni Amerika", në kulmin e luftës tregtare midis SHBA-së dhe Kanadasë, raportojnë Al Jazeera, AP dhe Reuters.

"Shtetet e Bashkuara po e marrin në konsideratë serioze ndryshimin e emrit të Liqenit Ontario në Liqeni Amerika, pasi ne nuk presim të bëjmë shumë biznes me Ontario-n më", shkroi Trump në Truth Social. Hapi do të ishte i ngjashëm me tentativën e tij vitin e kaluar për ta riemërtuar Gjirin e Meksikës në "Gjirin Amerika" përmes urdhërit ekzekutiv.

I pyetur për komentin e Trumpit, ministri kanadez përgjegjës për tregtinë me SHBA-në, Dominic LeBlanc, tha se Kanadaja nuk do t'u përgjigjet postimeve në rrjetet sociale të administratës amerikane. "Ne kemi vendosur si qeveri federale muaj më parë të mos i përgjigjemi postimeve të përditshme në rrjetet sociale të presidentit apo sekretarëve të kabinetit të tij", tha LeBlanc në një intervistë për CNBC.

Liqeni Ontario është një nga pesë liqenet e mëdha të Amerikës së Veriut dhe kufizohet me provincën kanadeze Ontario dhe shtetin amerikan të Nju Jorkut. Ontario është provinca më e populluar e Kanadasë dhe shtëpia e industrisë së automobilave të vendit, ndaj emri ka peshë simbolike në mosmarrëveshjen tregtare.

Retorika midis dy vendeve po përshkallëzohet: Trump u kërkoi të hënën udhëheqësve kanadezë të "rreshtoheshin" ose përballeshin me pasoja "shumë më të këqija" se tarifat aktuale. Kryeministri Mark Carney e akuzoi Uashingtonin se po përpiqet ta nënshtruante vendin e tij, ndërsa Kanadaja pregatiste kundërmasat tariffare të njoftuara të martën.